Fernsehluege am Samstigmorge oder doch lieber i d’Badi? I de Halbziit vom WM-Final is Bett? So Gemein! Dänn doch lieber in Wald go spille, Fürli mache und Schlangebrot mit Schoggibananepüree ässe. Hauptsach nöd schaffe. Über die grosse Themene und vor allem mit ganz vill Liebi macht d’Zürcher Band Luusbuebe Lieder für die chline und grosse Chind. Sie wüssed, dass mer Chind vill meh cha zuetraue als die meiste dänked. Gsellschaftlichi Theme sind ihne genauso wichtig wie gueti Fründschafte. 2016 spontan fürs Chinderprogramm vom Openair Wipkinge gründet, händ d’Luusbuebe drü Jahr spöter ihri ersti EP ufgnoh. Sit dem spilled sie uf chliine und bitzli grössere Bühne und händ mittlerwile ganz vill neui Lieder im Gepäck. 2022 chunnt ihres ersti Album «So Gemein» use. Luusbuebe mached Chindie-Folk uf ihri Art, aber au i de Tradition vo ihrne grosse Vorbilder Schtärneföifi und de legendäre Ohrewürm CDs wo sie i ihrere Chindheit ufe und abeglost händ
